Брэнд Carnuska, які стварае ўтульнае адзенне і свечы для беларусаў, 1 сакавіка паведаміў у Instagram пра навінку – соевую свечку ў форме слоіка згушчанага малака з водарам вяршковай згушчонкі.
«Вы калі-небудзь адчувалі пах чыстага шчасця? Я закансервавала яго спецыяльна для вас і цяпер прэзентую супернавінку – соевую свечку ў выглядзе слоіка згушчанага малака з водарам вяршковай згушчонкі. Салодкага, пяшчотнага і такога знаёмага водару, быццам у вас у руках апынуўся сапраўдны квіток у шчаслівыя ўспаміны. Гэта ідэальны мэтч для тых, хто вырас на згушчонцы і цяпер жыве з настальгіяй у сэрцы», – напісалі ў допісе @Carnuska.
Свечка зроблена з прэміяльнага соевага воску з араматызатарамі. Як паведамляецца, адна свечка можа гарэць каля 80 гадзін бесперапынна.
Замовіць навінку можна праз асабістыя паведамленні ў Instagram. Дастаўка магчымая па ўсім свеце: «Не важна, дзе вы цяпер сумуеце па Беларусі: у Варшаве, Вільнюсе, Нью-Ёрку ці Сіднэі».
Дарэчы, да гэтага Kyt__media сумесна з брэндам do.not.pretend стварылі лімітаваную калекцыю свечак з атмасферай восеньскага Мінска.
Свечкі пад назвай «Як пахнеш ты, восеньскі Мінск» выйшлі 27 кастрычніка. Стваральнікі апісвалі пах як спалучэнне свежасці, цяпла і спакою – менавіта такім яны бачаць горад восенню.
Перадрук матэрыялаў CityDog.io магчымы толькі з пісьмовага дазволу рэдакцыі. Падрабязнасці тут.
