Лепш за гэта відэа вы сёння дакладна нічога не ўбачыце

Сямігадовы Мацей, сын Ксюшы і Арцёма з гурта NaviBand, падзяліўся ў інстаграме сваёй гісторыяй, як упершыню трапіў на канцэрт улюбёнага гурта – AC/DC.

«Прывітанне! Я – Мацей. Мне 7. Я люблю музыку і гурт AC/DC», – так пачынаецца шчыры відэаролік, які з’явіўся ў інстаграме гурта NaviBand.

Мацей расказаў, што слухае AC/DC штодня: дома і ў машыне. Ён асабліва любіць падыгрываць гурту на сваёй гітары. Аднаго разу ў яго з’явілася мара – трапіць на канцэрт рокераў. І нечакана гэта стала рэальнасцю: ён атрымаў білеты акурат на свой дзень нараджэння.

Да падзеі рыхтаваліся загадзя. Напрыклад, сябар хлопчыка Філіп падарыў яму спецыяльную футболку. Гэта быў першы канцэрт Мацея на вялікім стадыёне. Спачатку ён крыху нерваваўся – «убачыў маленькую мурашку замест Ангуса Янга». Але хутка зразумеў: нічога не павінна стаць перашкодай на шляху да мары.

«Яны такія старыя, а яшчэ нешта могуць. Эмоцыі перапаўнялі, што пад канец канцэрта сілы сталі мяне пакідаць. Але шчасцю не было канца, – дзеліцца хлопчык. І дадае: – Не спыняйцеся марыць!»

Калі памятаеце, CityDog.io пісаў, што салістка беларускай групы NaviBand выканала разам з Шурай з «Бі-2» хіт «Мой рок-н-рол». Раней гэту песню выконвала Юлія Чычэрына, якая адкрыта падтрымлівае ваенныя дзеянні Расіі супраць Украіны.

Перадрук матэрыялаў CityDog.io магчымы толькі з пісьмовага дазволу рэдакцыі. Падрабязнасці тут.

Відэа: @Naviband.