CityDog.io ужо расказваў, колькі траціць маладая мама ў Мінску, як жыве мінчанка з заробкам каля 4000 руб. і на што ідуць грошы ў беларусаў у рэгіёнах. Працягваем рубрыку пра даходы і выдаткі: сёння сваім бюджэтам дзеліцца 26-гадовы Коля. Ён працуе ШІ-дызайнерам і капірайтарам на паўстаўкі і зарабляе 1000–1500 долараў.
– Я працую ШІ-дызайнерам і капірайтарам, рыхтую прэзентацыі і раблю пераклады з дапамогай штучнага інтэлекту.
Мне падыходзіць такі фармат: не трэба штодня хадзіць у офіс, няма пастаяннага ціску. Аплата залежыць ад таго, ці выканаў я вызначаны аб’ём працы. Звычайна атрымліваю ад 1000$ у месяц, а за апошні выйшла прыкладна 1500. Мяне такі даход цалкам задавальняе: на жыццё хапае.
Жыллё: да 400$ за камунальныя паслугі
– Я жыву ва ўласнай чатырохпакаёвай кватэры, яна ёсць у мяне дзякуючы бацькам. Здавалася б, на арэнду траціцца не трэба, але камунальныя плацяжы часам даходзяць да 400 долараў. Атрымліваецца, утрыманне кватэры абыходзіцца мне прыкладна ў тую ж суму, якую іншыя аддаюць за здымнае жыллё.
На транспарт ідзе каля 300 руб. у месяц. Звычайна езджу на аўтобусе, стараюся выбіраць маршруты без перасадак. Мне так цалкам камфортна, усюды паспяваю. Да таго ж працую ў гібрыдным фармаце: часам магу некалькі дзён працаваць з дома і заадно эканоміць на дарозе.
Перыядычна карыстаюся каршэрынгам. Шчыра кажучы, я даволі лянівы: пасля цяжкага працоўнага дня часам проста не хочацца ісці на аўтобус. Тады бяру машыну.
.jpg)
Ілюстрацыйнае фота: CHUTTERSNAP, Unsplash.com.
Ежа: каля 960 рублёў у месяц
– Менш за ўсё ў мяне ідзе на сняданкі – 210 руб. у месяц, бо я гатую іх сам. У асноўным гэта бялковая ежа: яйкі ці нешта з тварагу. Вячэры таксама гатую сам, на іх ідзе крыху больш за 100$ у месяц. А вось абеды сабе ніколі не гатую. Хаджу ў розныя месцы на бізнес-ланчы, і на гэта ідзе больш за ўсё – 450 руб. у месяц.
Яшчэ я трачу грошы проста таму, што хочацца. Люблю хадзіць па барах, у кавярні і рэстараны. Магу спакойна заплаціць за каву і не хачу сабе ў гэтым адмаўляць. Хаця на гэтым таксама можна значна зэканоміць: цяпер у Мінску нават звычайны амерыкана каштуе 7–8 руб. Часам, вядома, прасцей зэканоміць, але я не хачу пазбаўляць сябе гэтай раскошы – зайсці ў любімую кавярню, узяць каву і дэсерт.
Агулам на ежу ў мяне ідзе каля 960 руб. у месяц.
Тусоўкі і забавы: «Прыбраліся ў касцюмы і пайшлі ў казіно»
– Часам мы з сябрамі выбіраемся куды-небудзь пазабаўляцца. Нядаўна вырашылі прыбрацца ў касцюмы і пайсці ў казіно. Такое мы робім рэдка, таму было цікава паспрабаваць. На ўваходзе кожнаму трэба было заплаціць па 100$. Мы пагадзіліся, але ў выніку фішкі купілі толькі двое: мой сябар – на 150$, а я – на 50$.
Гулялі толькі ў рулетку, а на які лік ставіць, вырашалі разам: я кожны раз раіўся з сябрамі. Усё дэмакратычна. У выніку здарыўся цуд: я выйграў тры разы і атрымаў цэлых 500 руб. Было весела, але рэгулярна туды зазіраць я не планую.
Бываюць і перыяды, калі грошай амаль не застаецца. Тады пазычаю ў сяброў ці блізкіх, а потым усё вяртаю. Цяпер такое здараецца нячаста. Часам абыходжуся без пазык: скарачаю выдаткі, на апошнія грошы купляю прадукты і пакідаю крыху на транспарт. Пельмені, спагеці і яйкі – запас, які ў мяне мусіць быць абавязкова. На ім і выжываю.
Магу папрасіць сяброў чым-небудзь пачаставаць. Гэта ўзаемна: яны ведаюць, што ў цяжкай сітуацыі я таксама іх пачастую. Такі кругаварот рэчаў у прыродзе.
 (1).jpg)
Ілюстрацыйнае фота: Sandra Seitamaa, Unsplash.com.
Пра адкладанне грошай: «Сорамна, што ў мяне няма такой звычкі»
– Цяпер я перастаў адкладаць грошы, і мне за гэта сорамна. Хацеў бы вярнуцца да гэтай звычкі. Летась у мяне добра атрымлівалася збіраць, але ўсю фінансавую падушку я патраціў на адпачынкі. Пра гэта не шкадую, хаця з запасам грошай нашмат спакайней.
Пры гэтым праца на паўстаўкі мяне задавальняе. Мне падабаецца мой лад жыцця: я магу свабодна планаваць свой графік і практычна не абмежаваны ў перамяшчэннях. Для мяне гэта галоўны аргумент на карысць такой працы. Мне так вельмі камфортна.
Што беларусы кажуць пра сярэдні заробак у Мінску?
Пакуль Коля дзеліцца сваім бюджэтам, у сацсетках спрачаюцца, наколькі афіцыйная статыстыка адлюстроўвае рэальныя даходы. Паводле Белстата, сярэдні налічаны заробак у Мінску за верасень склаў 4021 руб. Гэта сума да выліку падаткаў. Але некаторыя карыстальнікі Threads у гэтых лічбах сваіх заробкаў не пазналі.
«Адкуль такія лічбы? Можа, хаця б па галінах падзяляць будзеце? У каго ўвогуле такія заробкі? І дзе яшчэ мае 3000?» – абураецца @_rinka_chan. І тут жа іранізуе: «1000 + 7500 = 8500 ÷ 2 = 4250. Не, ну добра, у цэлым усё сыходзіцца».
Іншыя лічаць, што такія даходы цалкам дасягальныя. «У Мінску вельмі лёгка зарабіць ад 2к, проста працаваць трэба», – піша @asia_nemceva. Ёй пярэчыць @roggerus: «Так шмат людзей працуе менш чым за 2к і ўколвае».
Сваім досведам дзеліцца @kovalevski: працуе праграмістам, атрымлівае больш за 14 тысяч рублёў у месяц і, паводле яго слоў, асаблівых цяжкасцей з пошукам працы не меў. А @vel.essss піша, што сярод знаёмых ва ўзросце 20–28 гадоў хтосьці зарабляе дзве тысячы, хтосьці – шэсць. Таму сярэдні заробак каля чатырох тысяч яе не здзіўляе.
Зрэшты, карыстальнікі нагадваюць: сярэдні заробак не азначае, што большасць атрымлівае менавіта столькі. На паказчык уплываюць і высокія, і нізкія заробкі, а даныя па асобных галінах могуць заўважна адрознівацца.
Само абмеркаванне падсумоўвае @basis.lo: «У трэдсе пра заробкі бачу два віды галінак: людзі расказваюць, што добра зарабляюць у Мінску, іх называюць пустабрэхамі. Людзі расказваюць, што сярэдні заробак па Мінску – гэта фэйк і рэальны заробак – 1000 рублёў».
Перадрук матэрыялаў CityDog.io магчымы толькі з пісьмовага дазволу рэдакцыі. Падрабязнасці тут.
